Baraarug

MAANSO

Shiikh beri na waaniyay

Wuxu yidhi "billaahiye

Hablahaa barbaarta ah

Inta beladu wadatee

Bixisee dharkii nacay

Waxa bi'iyay waa hee:

Indho lagu bidhiiqshoo

Egmadaa ku faro badan

Asturaadda biliga leh

Si ay ugu badhaadhaan

Boholyoow u laabtaan

Baahidiina daymada

Ciiddiyo la beegsada

Dhulka boodhka weynloo

Bu'da iyo indhaha deda!"

Kol danboon baraarugay

Bartay inu qof jaahila

Iyo beenowaas yahay.

Shiikh beri na waaniyay

Wuxu yidhi "billaahiye

Qorraxdaa buruudkiyo

Nuurkiyo bidhaanta leh

Waxan qayb bakhtiiyee

Dayaxana badh damiyaa

Arrin buuran weeyee

An idiin biniixiyo:

Rabbigii bineeyaa

Cadhadiisu badatoo

Idinkaa wax baasiyo

Fuxshi baahinaayee

Baqdintiisa laasima"!

Kol danboon baraarugay

Bartay inu qof jaahila

Iyo beenowaas yahay.

Shiikh beri na waaniyay

Wuxu yidhi "billaahiye

Bugtadiyo xanuunnadan

Bud-dhigaaya aadmiga

Muslinkiyo bahdaan nahay

Burji iyo wax yaabloo

U bukhuursanaa bay

Ku badbaadi doonaan

Kuna baacsan doonnaa

Bili baynu leenahay

Iyo baalal hoosoo

U bukoonba maynee

Iska wada bulsheeyoo

Ballamuhu sidii hore

Iyo baahi korodhsiya

Niman baadiyoobaa

'Soo baydha' diidoo

Basrin sida u taal iyo

Waa barbaarin gooniya!"

Kol danboon baraarugay

Bartay inu qof jaahila

Iyo beenowaas yahay.

Culimada badh baa jecel

Inay sheeko-baraleey

Diimaha ku biirshaan

Badankoodu xeeshaa

Allifaadda beenaha

Waxay ugu bahoobeen

Si ay kuu busteeyaan

Bajin iyo waxaan jirin

Kugu baraqnugleeyaan

Balse waxay hilmaameen

Waxyigii bayaamiyay

"Inay diintu buuriyo

Tahay buuxsan waafiya"

Waxse ay bannaysteen

Biyo-dhaca gefkoodiyo

Denbi inay baddaasheen

Inan laga badheedhine

Waxan maanso kaga baxay

Qofka baydhay ee lumay

Berri iyo dambaysada

Xogo noqon bar kuma taal

Baydhsanaanta uu rabo

Kaga baaqsan maayee

Runta ugu bushaaree.